Qytetet shqiptare në vitet 1920-1940 përpjekjet e para për organizimin urbanistik dhe arkitektonik të tyre me tipare dhe skema perëndimore

Ky punim ka për qëllim të trajtojë aspekte të modernizimit të vendit tonë, si një proces i shtrirë historikisht në kohë e hapësirë përgjatë një shekulli të tërë, atij të XX-të, që në tërësinë e tij do të njohë tri data vendimtare, tri kthesa politike ekstreme, tri projektime zhvillimi me inspirime ideologjike dhe njëkohësisht tri orientime kulturore të ndryshme. Nga ana tjetër qasjet studimore përgjatë këtij punimi do të marrin pikërisht vetëm disa dukuri të periudhës së parë të këtij rrugëtimi, që kanë të bëjnë me modernizimin urban të Shqipërisë. Ky proces ka startuar kryesisht pas vitit 1912 (një vit emblematik ky për historinë shqiptare, i cili shënon shkëputjen përfundimtare të saj nga pushtimi shekullor osman dhe hapjen ndaj modernitetit perëndimor), ndërkohë që ky modernitet urban do të mundësohet falë reformave perëndimore të mbretit Zog dhe veçanërisht nëpërmjet Protektoriatit Italian.