Margaret Hasluck, 1885-1948

Përpara inteligjencës shqiptare, qëndron detyrimi moral për ndritjen e figurës së shkencëtares angleze, Margaret Hasluck. Kjo barrë, më shumë, u takon intelektualëve elbasanas, jo për tjetër gjë, po ngaqë anglezja e famshme, duke banuar për 13 vjet në Elbasan, i dha emër të mirë qytetit tonë, kudo në botë. Ka qenë një kohë, kur historia e qytetit u lidh ngushtë me jetën e kësaj zonje të nderuar. Si padashur, emri i saj u përjetësua nëpër rrugë e ndërtesa, por edhe nëpër lule e pemë. Në fëmijëri ne dilnim për shëtitje me shkollën nga “Rruga e Englezkës”, shihnim “Vilën e Englezkës”, laheshim te “Rema e Englezkës”... Ndërsa nëpër oborre, mbanim trëndafila të “englezkës” e rritnim mollë nga të sajat. Po erdhi një kohë, më vonë, kur s’na linin ta zinim me gojë Gretën tonë... dhe, pastaj zunë të na e denigrojnë e t’i ngjisnin lloj-lloj bishtash... E kush e bënte këtë?.