O retorno e os conflitos da identidade

A emigración da poboación galega na posguerra foi moi elevada, como elevado foi tamén o retorno das persoas emigradas, especialmente durante a transición. Para elas, non só foi difícil a marcha do país, senón tamén o regreso a un lugar en aparente democracia, mais aínda en conflito polas feridas non reparadas da contenda. A través da lectura de ensaios e novelas centrados no retorno, preténdese convidar á reflexión sobre as consecuencias do regreso ao lugar de orixe e analizar a súa repercusión nos ámbitos familiar, social e político, entre outros. Falamos de ruptura da identidade, de inadaptación crónica, de choque xeracional, de decepción, desengano ou desarraigo, situacións todas elas que evidencian os conflitos dunha identidade en permanente (de)construción.