यो जितः नं देश यो तर जिं मखं जिगु देश गो म्येय् संकथनीय दृष्टिकोण Yo Jita: nam Desha yo tara Jim makham Jigu Desha Go Myem Sankathaniya Drishtikon

स्वच्छन्दवादी कवि दुर्गालाल श्रेष्ठया नेपालभाषा साहित्यय् त्वःफिके मज्यूगु नां खः । कवितायात संगीतात्मक, माधुर्य, कोमलता व सरलतां जाःगु काव्य रचना यानाः थःगु म्हसीका बियादीम्ह कवि दुर्गालाल जनवादी साहित्य रचनाय् नं न्ह्यःने लाः । राज्यसत्तां यानाच्वंगु असहज परिस्थितियात खबरदारी याय्कथं च्वसा न्ह्याकाः वयाच्वंम्ह कविं थुगु कविताय् देशय् च्वनाः नं देशया अनुभूति याय्मखंगुया पीडा बोध दु । पंचायती व्यवस्थाया परिवेशय् च्वःगु थुगु कविताय् अनागरिक जुयाच्वंपिनिगु पीडाया लिसें असमानता वअन्याययात माधुर्यपूर्वक न्ह्यःने हःगु दु । शव्दं नं विद्रोहया शंखघोष याय्फु धइ थें जाःगु अभिव्यक्तिं जाःगु शव्द छ्यलातःगु थ्व कविताय् विद्रोहं हे देश निर्माणया भूमिका तयार जुइ धइगु भावना दुथ्याः । ल्यत्तुल्यया सितिं मवंक छ्यलातःगु शव्दया लिधँसाय् च्वयातःगु थ्व कविता शोषित पीडितपिनिगु वकालत याय्त नं छ्यःगु दु । जि पात्र अर्थात सर्वनामयात प्रतिनिधित्व याकाः मनोवाद शैलीं च्वयातःगु थ्व कवितायात म्वाय्कं भूमिका नंबियातःगु मदु । थुकिं यानाः वैचारिक आन्दोलन, शोषित व गरीव जनताया प्रतिनिधित्व यानाः च्वयातःगु थुगु कविता वैचारिक कविताया धलखय् कोशल्वहंकथं नाले बहजू ।