Dağınıq sklerozun differensial diaqnostikası

Hal-hazırda yeni müayinə metodlarının (MRT, sensor və motor törədilmiş potensiallar) yaranmasına baxmayaraq, dağınıq sklerozun (DS) diaqnostika və differensial diaqnostikası asan olmayan məsələ olaraq qalır. Dəqiq DS diaqnozu ilkin simptomların meydana gəlməsindən orta hesabla 2-3 il sonra qoyulur, xəstələrin təxminən yarısı isə diaqnoz qoyulan anda artıq ən azı 5 il bu xəstəlikdən əziyyət çəkmiş olurlar. DS diaqnozlu xəstələrin təxminən 10-dan 1-də digər xəstəlik olur və əksinə 4-5% hallarda DS-li xəstələrə əvvəlcə başqa diaqnoz qoyulur. DS-in diaqnostikasında xəstəliyin klinik əlamətləri əsasdır – “məkan və zamanda dağınıqdırlar”. Anamnestik məlumatlar dəqiq təhlil olunmalıdır. Xəstəliyin ilk kəskinləşmə vaxtının və onun təzahürlərinin müəyyənləşdirilməsi vacibdir.