Cambio lingüístico e morfoloxía: aproximación ao galego da comarca do Ribeiro

Neste traballo estúdanse algunhas variables lingüísticas de tipo morfolóxico. Trátase da alternancia /u/ ~ /ɔ/ como vogal radical (VR) na P2, P3 e P6 dos verbos tipo durmir e subir e a variación entre pór e poñer; facer, faguer e faer; fixen e figuen; e oír, ouvir, oucir e ouír na comarca do Ribeiro. Téntase demostrar que o factor territorial e a idade son determinantes para a aparición dunhas variantes ou outras. Polo tanto as variables que se teñen en conta son o lugar de nacemento e a idade. O corpus de estudo está constituído polas respostas de trinta informantes a un cuestionario e pola transcrición dunhas 30 horas de entrevistas semidirixidas. Os informantes pertencen a tres grupos de idade diferentes. A escolla de informantes de diferentes idades permite estudar o cambio lingüístico en tempo aparente e determinar se existen tendencias de cambio que afectan ás variables arriba mencionadas.