O traxe rexional na obra narrativa de Emilia Pardo Bazán

A cultura rural, particularmente a indumentaria, é un elemento narrativo imprescindíbel na obra literaria de Emilia Pardo Bazán. O traxe rexional galego é obxecto de interese antropolóxico por parte da autora (fundadora da Sociedad del Folk-Lore Gallego en 1883 e promotora do cuestionario do folclore galego de 1885), inclinación que a leva a realizar exhaustivas descricións deste tipo de indumentaria tradicional en obras como La gallega, en contos como Eterna Lei e mesmo na súa novelística máis urbana, representada por La Quimera. O seu gusto polo traxe rexional responde a unha dobre finalidade, ofrecer unha visión antropolóxica da vestimenta popular en Galicia e caracterizar tanto os grupos sociais do rural como algúns personaxes inesquecíbeis como Minia en Un destripador de antaño ou Maripepiña en Bucólica.