Teatro xuvenil e memoria histórica: "Con Franco nun armario" de Bernardino Graña

A consecuencia do golpe militar de 1936, o teatro galego foi practicamente inexistente en Galicia ata a fundación da Editorial Galaxia a comezos dos anos cincuenta. É precisamente en Galaxia onde Bernardino Graña inicia a súa angueira teatral coa publicación de Vinte mil pesos crime en 1962. O seu labor no eido da dramaturxia non cesará ata 2010, ano en que publica a farsa para nenos Larpancia saborosa do lobo e da raposa, ata o momento, a última peza teatral publicada polo autor. Este artigo abordará o estudo da dramaturxia de Bernardino Graña centrándonos na obra Con Franco nun armario, na que analizaremos os temas principais, así como os motivos temáticos da violencia, a morte e a crítica social e histórica.