Mulleres diante. Rostros femininos e acción colectiva no rural galego

Fronte á idea asentada da inexistencia de accións sociais colectivas de carácter reivindicativo no rural galego ata as últimas datas do franquismo e ós estereotipos de xénero do nacionalcatolicismo que relegaban á muller a un espazo privado definido pola submisión, o presente texto trata de resaltar a presenza de mulleres á cabeza de movementos de protesta nese período. E farémolo seguindo o fío condutor das reivindicacións en contra da Hermandad Sindical de Labradores y Ganaderos que materializaron as labregas do concello de Pontevedra nos anos cincuenta. Trataremos de interpretar as estratexias empregadas para manobrar dentro das circunstancias impostas por un réxime ditatorial así como escudriñar no universo simbólico ó que apelaban para arrogarse a representación das súas familias e comunidade nun momento de conflito aberto.