Ba al dute erru sentimenduak, lotsak eta harrotasunak funtzio positiborik?

Erru sentimendua, lotsa eta harrotasuna “emozio auto-kontzientetzat” edo “auto-ebaluaziozkotzat” sailkatu ohi dira, norberaren edo Niaren ebaluazio baten ondorioz sortzen baitira. Auto-ebaluaziozko emozio horiek batzuetan gatazkatsuak izan daitezkeen arren, eta pertsonarentzat ondorio desatseginak izan ditzaketen arren, funtsezko funtzioak ere betetzen dituzte (bai pertsona arteko eremuan, baita eremu moralean ere). Bestalde, Niak jokabidearen kontrolerako dituen ezinbesteko gidak dira: jokabideak bide onetik doazen ala ez adierazten diote Niari. Jokabideak egokiak direnean, pertsonak norabide berean jarrai dezake (harrotasunaren kasua), eta, desegokiak direnean, norabide-aldaketa eskatzen diote (erru sentimenduaren eta lotsaren kasua).