HEAR– ЭШИТМОҚ СЕЗГИ ФЕЪЛЛАРИ ЭВИДЕНЦИАЛ МАРКЕРЛАРИ

Мазкур мақола инглиз тилидаги эвиденциаллик категориясини семантик доирада ўрганишга бағишланган. Эвиденциал категория ўзбек тилида ҳали таҳлил қилинмаганлиги боис, у мақоланинг объектини ташкил этади. Ушбу категория маълум умумий назарий атамаларнинг семантик функцияси бўлиши билан бир қаторда ана ўша атамаларнинг тилдаги лексик ва грамматик ижросини таъминловчи кенг тарқалган когнитив бирлик эканлиги дунё олимларининг мулоҳазалари орқали ёритиб берилган. Шунингдек, инглиз тилидаги “hear” ҳамда ўзбек тилидаги “эшитмоқ” сезги феълларининг грамматик маркерлари бир-бирига қиёслаб ўрганилгани ҳолда бадиий адабиётлардан олинган матнлар намунасида ёрқин мисоллар билан кўрсатиб берилган. Бундан ташқари, мақолада эвиденциаллик лисоний ҳодисаси грамматик маркерланган бўлиб, бирор эвиденциал морфема воқеликка алоқадор бўлган бир нечта маълумотни қамраб олганлиги айнан сезги феъллари орқали таҳлил қилинган. Эвиденциаллик тушунчаси бирор маълумотнинг асосини белгилашга хизмат қилиши орқали субъектнинг шахсий кузатиши, яъни бевосита гувоҳлик беришини амалга ошириб, бирор кимсанинг муайян объектни ёхуд воқеликни кўриши орқали, сезги органлари ёрдамида ҳис қилишига нисбатан ишлатилиши ёки маълумот асоси бошқа манбага тегишли бўлиб, билвосита юзага келиши мумкинлиги мақоланинг илмий янгилигини намоён қилади.